L'Institut d’Estudis Aranesi

Institut d’Estudis Aranesi

L’Institut d’Estudis Aranesi qu’ei ua institucion d’assessorat tecnic e scientific de la Val d’Aran e deu Conselh Generau d’Aran. En promòvent la soa existéncia, lo Conselh Generau que volè completar l’encastre institucionau de la Val d’Aran, afirmar la soa identitat mercés a la creacion d’elements de referéncia, d’estructuras academicas qui podossen resòlver questions pregondas d’assessorat scientific. L’IEA qu’a tres seccions : lingüistica, estudis juridics e istòria.

La prumèra reünion de la seccion lingüistica que’s hasó en 2001, e que’s reüneish periodicament entà determinar las modalitats lingüisticas qui cau emplegar entaus escriuts dens los mejans de comunicacion. L’IEA que reïvendica un tribalh volontari e desinteressat afin que la Val d’Aran aja ua institucion referenciau dens los tres maines academics mei importants de l’identitat d’un pòble : la lenga, l’istòria e las institucions juridicas.

L’organe centrau de l’IEA qu’ei lo Plen (tienguda plenària), reünion deus membres numeraris qui vòtan las decisions e noman entermiei eths un President dont lo mandat ei de quate ans, renovelader un còp. La seccion lingüistica qu’a lo son foncionament pròpi, dab un Plen de dètz membres numeraris qui’s pòt apear sus la participacion pontuau de membres correspondents. Lo Plen de la seccion lingüistica que’s reüneish a mes passat. La soa foncion qu’ei d’elaborar projèctes e miar recèrcas sus l’aranés dens divèrs encastres lingüistics, e de prepausar au Conselh Generau d’Aran estudis e resolucions en ligam dab l’aranés o la lenga occitana en generau.

L’IEA, en Aran, qu’ei un element de compte har de la lei de l’occitan aranés. L’article 4 que ditz que l’Institut d’Estudis Aranesi e deu estar independent de las administracions publicas, abastar pleament lo caractèr academic qui l’ei atribuit e aver l’autoritat lingüistica d’establir las convencions d’usatge de l’aranés en hant compte deu son caractèr de varietat lingüistica deu tronc occitan comun. Uei lo dia, l’IEA e lo Conselh Generau d’Aran que son en trin de pensar a un cambiament deus estatuts e a l’evolucion de l’IEA de cap a ua Academia.

Site Internet : www.cultura.conselharan.org