Letra de ligason :

Centre de Recursi Pedagogics dera Val d’Aran

Centre de Recursi Pedagogics dera Val d’Aran

Lo Centre de Recursi Pedagogics dera Val d’Aran : que s’ageish de servicis educatius qui, dens l’airau territoriau aranés, e sostienen l’activitat pedagogica deus centres escolars e lo prètzhèit d’ensenhament deus regents e deus professors ; qu’ei format d’ensenhaires foncionaris deu prumèr e deu segond grad e qu’a las foncions seguentas :

  • auhèrta de ressorças, infrastructura e servicis aus centres escolars, aus regents e aus professors afin que dispausen de materiaus especifics aus diferents maines d’estudis, de mejans pròpis a la tecnologia educativa e de publicacions especializadas, dab assessorat o instruccions d’utilizacion.
  • catalogacion de las ressorças educativas deu demiei locau e aranés e elaboracion d’informacions complementàrias entà’n facilitar l’usatge au professorat.
  • sostien a las activitats d’ensenhament e de l’escambi d’experiéncias educativas, dab la tòca de desvolopar la reflexion deu professorat sus la practica ensenhaira medisha.
  • coordinacion e organizacion de la realizacion e deu seguit de las activitats de formacion permanenta, en collaborant a la deteccion deus besonhs de formacion e a l’elaboracion de proposicions entà las satisfar.
  • autas foncions atribuidas peu Departament d’Educacion.

La Chambra d’Òc

Chambra d’Òc

La Chambra d’Òc qu’ei una associacion qui amassa personas qui trabalhan los produits de la tèrra, qui hèn los artisans, qui viven deu torisme, activas entà la renaishença lingüistica e culturau de las Valadas. La Chambra d’Òc que tribalha sus tot lo territòri occitan en Italia e sustot dens las Valadas.

Los membres de la Chambra d’Òc que son artisans, cultivators, comerçants, aubergaires, associacions culturaus, grops musicaus, e personas de competéncias de tot ordi.

Lo son objectiu generau qu’ei d’elaborar e de realizar projèctes transversaus dens las Valadas, dab ua vision d’ensemble deu territòri, entà har anar de cotria la necessitat de la reapropriacion lingüistica e culturau, l’internacionalitat deu pòble occitan e la renaishença economica. La Chambra d’Òc que tribalha per sectors e per projèctes en collaboracion dab las personas disponiblas de las Valadas e las institucions : Comunas, Comunitats de Montanha, ATL, Parcs, Províncias e Regions.

La Chambra d’Òc que compta tres sectors d’activitat :

  • lo sector linguïstic e culturau que s’ocupa de :
    • formar ensenhaires ;
    • conselhar e supervisar l’elaboracion e la realizacion de projèctes a l’escòla ;
    • formar operators culturaus de terrenh ;
    • realizar experimentacions lingüisticas, pedagogicas e culturaus de terrenh dab l’activacion de cors sus comanda de l’Assessorat a la Cultura de la Region Pèmont ;
    • elaborar materiau didactic ;
    • activar un Servici de la Lenga, burèu de servici e de conselh lingüistic aus organismes publics e privats ;
    • realizar una edicion bilingua.
  • lo sector internacionau : participacion a plusors manifestacions transfronterèras com l’Estivada de Rodés, la Fèsta d’Òc e la Feria de Besièrs, e a congrès internacionaus.
  • lo sector productiu : valorizacion deus produits gastronomics e artisanaus de las Valadas, creacion de la marca « Chambra d’Òc » dens divèrs magazins, valorizacion deus produits tipics

Site internet : www.chambradoc.it

La Confederacion calandreta

Calandreta

La Confederacion calandreta (ensenhament laïc, immersiu, occitan) qu’ei ua associacion qui amassa, en 19 departaments, 64 escòlas, 4 collègis e un licèu on s’i practica l’ensenhament immersiu en occitan. Creat en 1979, lo movement qu’a uei lo dia 3 894 mainatges escolarizats e qu’emplega 223 regents e mei de 300 salariats non ensenhaires. L’occitan ensenhat qu’ei la varianta deu parçan de l’escòla.

Cada escòla qu’ei gerida per ua associacion deus parents qui emplega los salariats non ensenhaires. Los regents que son pagats per l’Estat mercés a un contracte d’associacion signat enter l’Estat e las calandretas. Que respèctan las instruccions oficiaus de l’Educacion Nacionau. La pedagogia qu’ei basada sus l’immersion (lo francés qu’ei integrat a partir deu CE1) e sus las tecnicas Freinet e la pedagogia institucionau. Atau, l’expression libra deu mainatge qu’ei centrau e la democracia intèrna qu’ei encoratjada. Cada establiment Calandreta que participa a l’accion culturau occitana e que’s religa a la vita culturau deu son parçan.

Los regents de Calandreta que son formats au Centre APRENE – Establiment d’Ensenhament Superior Occitan a Besièrs.

Site Internet : http://calandreta.org

Lo Centre Interregionau de Desvolopament de l’Occitan

Lo CIRDOC

Lo CIRDÒC - Centre Interregionau de Desvolopament de l’Occitan, Mediatèca occitana, qu’ei l’establiment public de vocacion interregionau encargat d’aparar, de promòver e de har conéisher lo patrimòni e la creacion occitana. Lo CIRDÒC qu’ei una estructura originau, qui’s vòu adaptada tant a l’istòria com a la geografia occitana, qui representa 1 000 ans de cultura viva. Qu’ei lo sol establiment public (sindic mixte) de la cultura occitana, dab 14 emplegats (dont un conservator, plusors encargats de conservacion, e un pòle informatic). Qu’a un gran bastiment dens lo centre de Besièrs.

A l’òra d’ara, la colleccion qu’ei de mei de 80 000 títols publicats deu sègle XVIau a uei lo dia (manuscrits, libes, archius, revistas, particions, enregistraments sonòrs e audiovisuaus, afichas, fotografias, etc). Mercés a ua politica d’aquisicion sostienguda e sistematica, mercés a dons e lèishs generós, las colleccions deu CIRDÒC que son hèra completas.

Per’mor deu desvolopament d’aquestas e de l’expertisa aquesida dens lo maine deu patrimòni e de la creacion en occitan, que signè en 2006 dab la Bibliotèca Nacionau de França ua convencion de pòle associat qui’u reconeish l’autoritat tà çò de la lenga e la civilizacion occitana.

Entermiei las missions novèlas qui lo CIRDÒC deurà complir com establiment d’excelléncia documentària, que figuran la produccion de la bibliografia occitana e lo desvolopament de la cooperacion autorn deu patrimòni occitan.

Lo CIRDÒC que mia accions interregionaus entau patrimòni e la creacion occitana : partenariats de numerizacion d’òbras, coproduccions d’eveniments, sostien aus portaires de projèctes au nivèu interregionau, creacion d’utís de coneishença e d’espandiment de l’occitan (Bibliografia occitana, portau Internet « La Pòrta d’Òc » – www.laportadoc.eu –, observatòri de l’edicion), concepcion e prèst de mustras o de documentacion. 
Enfin, lo CIRDÒC que pòrta la mestria d'òbra de la grana mediatèca virtuau cooperativa - www.occitanica.eu - vertadèra platafòrma de difusion multimèdia deu patrimòni e de la creacion occitana. Qu’ei un projècte istoric au quau participan institucions culturaus e collectivitats territoriaus de l'espaci occitan.

Site internet : www.locirdoc.fr