La Region Auvèrnhe signa la Carta interregionala

Carta interregionala per l'occitan

Per una conferéncia de premsa que se tenguèt en novembre passat, lo president de la Region Auvèrnhe anoncièt doas avançadas màgers per la politica lingüistica de la region. En promièr, s'engatgèt de botar en plaça una convencion amb lo rectorat de Clarmont, entre la dintrada de 2014, sobre l'ensenhament de l'occitan. Anoncièt amai la signatura de la Charta de cooperacion interregionala e transfrontalèira pelh desvolopament de la lenga occitana.

Aquelh tèxte, ja signat per cinc Regions (Aquitània, Lemosin, Lengadòc-Rosselhon, Miègjorn-Pirenèus, Ròse-Alps), definís una tèira d'accions comunas e una armonizacion de las intervencions en favor de l'occitan. I es particularament fait mencion de la « participacion a la creacion e alh foncionament d'una institucion de regulacion occitana qu’aja coma objectiu de garantir la qualitat de la lenga transmesa e difusada ».