Reaccions en seguida de la sasina del Conselh constitucional contra la lei per las lengas regionalas

Reaccions a la sasina del Conselh constitucional

Còp de teatre legislatiu. A la suspresa generala, lo Conselh constitucional foguèt sasit per 60 deputats... De la majoritat, lo darrièr jorn abans promulgacion de la lei pel president de la Republica

Las reaccions d’incompreneson, de colèra e d’indignacion autant per las parts dels portaires de la lei coma pels deputats de tot bòrd politic a favor de la lei se faguèron pas esperar. En efièch, la question del respècte del vòte majoritari al Parlament, e doncas dels representants dels territòris, se pausa quand se sap pas perqué lo president a esperat fins al darrièr moment per promulgar la lei...

Mas al delà : nombroses foguèron los articles de premsa a parlar de malaise al còr del quite partit presidencial, de « manòbras politicianas bassas » o de « psicodrama dins la majoritat » segon RMC e BFM TV, e mai d’unes acusant Jean-Michel Blanquer d’aver « pilotat en sos-man la sasina » çò ditz Le Parisien, segon de revelacions del jornal La Lettre A.

Responsa unanima de las institucions

Iniciativa inedita : quatre oficis de lengas regionalas (l’Ofici public de la lenga occitana, l’Ofici public de la lenga catalana, l’Ofici public de la lenga bretona e l’Ofici public de la lenga basca) signèron un comunicat comun de reaccion conjoncha al recors contra la lei Molac sus las lengas.

Vòlon atal « exprimir amassa [lor] decepcion, [lor] incompreension e [lor] malcontentament » en fustigant los « trebucs e travas nombroses e recurrents dins mantuns domènis ». Sostenon encara que « l’espandiment d’una politica publica volontarista [respond] a una demanda sociala e a un consensus societal, politic e institucional ».

Lo Collectiu Pour que vivent nos langues manifestèt tanben son « estupefaccion pregonda », fàcia a las contradiccions intèrnas nombrosas dins las decisions de la majoritat, e l’opacitat que demòra a l’entorn d’aquela sasina : « Sus qué pòrta precisament aquel recors, e quals ne son los autors ? » çò demandan. En parlant de situacion « ubuesca », denóncian aquel agís qualificat d’« anomalia democratica ». Coma sòci del Collectiu, Lo Congrès se junta tanben a aquela denonciacion.

Mai d’un deputat interpelat faguèron pè-enrè e retirèron lor signatura, d’autres claman encara qu’èran pas assabentats d’èsser signataris. La polemica enfla e una clarificacion atal coma una transparéncia totala n’es demandada al govèrn central pertocant aquela question.

Lo Conselh constitucional dispausa ara d’un mes per determinar la constitucionalitat de la lei. Lo Sagelador Jean-Jaques Urvoas a ja balhat d’elements per rapòrt a aquela question, de faiçon pro clara.

  • Veire la video :