La region Occitania qu’ahorteish l’occitan dens los trins regionaus

Transòrts Occitania lengas regionaus

Dens un comunicat de debut d’abriu, Carole Delga que presenta la part bèra acordada a las lengas occitana e catalana dens l’educacion e los transpòrts en la region Occitania.

Si l’objectiu purmèr be n’ei de « har créisher lo nombre de locutors bilingües », la socializacion de la lenga n’ei pas de rèsta dab la mesa en plaça d’« ua senhaletica bilingua, visuau e sonòra, dens las garas ».

Las lengas regionaus que s’afichan dens los transpòrts

Autanplan en catalan com en occitan, qu’assolida qu’« un afichatge bilingüe dens las garas qu’ei un mejan de promòver las lengas regionaus cap aus abitants d’Occitania ». Atau, « tanlèu lo mes d’abriu, las anóncias de las linhas Portbou/Salses e Tolosa/Aush que seràn respectivament francés-catalan e francés-occitan. Lo nom de las garas en lengas regionaus que serà integrat deu mes de julhet enlà, e la correccion de cèrts panèus, taus com los de la gara de Perpinhan, realizada ».

Las anóncias vocaus que son ja entenederas dens los trins e las garas de las linhas correspondentas. Lo Congrès qu’ei l’organisme encargat de la part occitana deu projècte de socializacion de la lenga capvath aquesta linha pilòta.

© Fòto : Lapeyrere Sébastien - Région Occitanie