Borsas « Ensenhar » per l'occitan

Borsas ENSENHAR

La borsa d’estudi ENSENHAR s’adreça als estudiants que se destinan a ensenhar en occitan dins las escòlas mairalas e elementàrias de las filièras publicas bilingüas occitan-francés e del fialat associatiu Calandreta dins las acadèmias de Bordèu, Limòtges, Montpelhièr, Peitius o Tolosa (regions Novèla-Aquitània e Occitània).

D’un total de 4 000 € atribuïts per annada universitària (que se pòt renovelar una seconda annada, jos condicion, siá un total maximal de 8 000 €), s’agís d’una ajuda individuala e a prètzfach (que se pòt cumular ambe d’autras ajudas individualas). Es accessibla als estudiants inscrits en Licéncia 3 o Master 1, motivats per l’ensenhament en occitan e engatjats dins una formacion universitària que prepara al mestièr d’ensenhant de classa bilingüa*.

Lo dispositiu de borsa d’estudi ENSENHAR a per objectiu de sostenir las vocacions al concors de recrutament dels professors de las escòlas bilingüas, dins lo quadre d’un partenariat entre las Regions Novèla-Aquitània e Occitània, lo ministèri de l’educacion nacionala e l’Ofici public de la lenga occitana. S’agís en efièit de respondre a la demanda creissenta de dobertura de novèls sites escolars bilingües dins nòstras acadèmias.

Los estudiants interessats son invitats a depausar un dorsièr de candidatura alprèp de l’Ofici public de la lenga occitana abans lo 30 de setembre que ven (informacions, condicions e lista de las formacions eligiblas sus son site internet : www.ofici-occitan.eu).

Una borsa tanben pels professors ja en pòste dins l’Acadèmia de Bordèu

L’ofèrta de finançament de formacion « ENSENHAR » a destinacion dels professors de 4000 € cobrís integralament los fraisses de la formacion pels ensenhaires volontaris que son ja en pòste dins l’Acadèmia de Bordèu e qu’an obtengut un comjat de formacion dins lo quadre del plan de formacion continua del Rectorat. Dins un primièr temps, la demanda de formacion s’efectua alprès de la DSDEN de restacamaent pel primièr gra o del Rectorat pel segond gra.

Una formacion de 10 meses a temps plen (una annada escolara), desliurada per un centre agradat del departament, permet de passar una certificacion complementària per ensenhar la lenga occitana o una disciplina en occitan. La formacion altèrna de corses de lenga occitana atal coma d’estagis. Durant la totalitat de la formacion, lo salari de l’ensenhaire es mantengut a 100%.

L’annada escolara que seguís, los professor(a)s de las escòlas formats(das) son prèstes(as) a ensenhar en occitan dins un site bilingüe (mairala o elementària) e los professor(a)s dels collègis o licèus pòdon ensenhar l’occitan o lor disciplina non lingüistica (DNL) en occitan dins lor establiment d’origina o dins un establiment pròche.

Lo dossièr deurà èsser adreçat (per via postala e numerica) a l’Ofici public de la lenga occitana : 22, Boulevard du Maréchal JUIN – 31406 Toulouse cedex 9 – contact@ofici-occitan.eu

Comprendrà aquel dossièr :

  • Un CV ;
  • Una letra de motivacion que presenta lo projècte professional e que precisa lo tipe d’ensenhament bilingüe al qual lo candidat se destina o es en pòste ;
  • La letra d’engatjament emplenada e degudament signada ;
  • Una còpia del darrièr decret de nominacion dins lo còs ensenhant ;
  • Lo certificat d’obtencion de la formacion per la DSDEN o lo Rectorat

Contacte borsa d’estudi ENSENHAR : contact@ofici-occitan.eu

* modalitat d’eligibilitat al dispositiu de la borsa d’estudi ENSENHAR : www.ofici-occitan.eu