"Romanica" : una aplicacion/jòc de la DGLFLF per descobrir 8 lengas romanicas

Romanica

En collaboracion amb lo ministèri de la Cultura, de l’estúdio CCCP e de l'Organizacion internacionala de la Francofonia (OIF), lo Thibault Grouas, capmèstre de la mission Lengas e numeric de la Delegacion generala a la lenga francesa e a las lengas de França (DGLFLF) desvolopèt un jòc

dins lo qual descobrir lo vocabulari de 8 lengas romanicas : l'occitan, lo catalan, lo còrse, lo romanés, l'italian, lo castelhan, lo portugués e lo francés.

Se farguèt dins l'encastre de la Sason culturala França-Romania de'n primièr, mas s'alarguèt naturalament a d'autras lengas romanicas. En efièch, segon lo quite autor, la tòca es « d'explorar lo potencial plurilingüe que dormís en nosautres tots », mas tanben de « sensibilizar los utilizators a la diversitat lingüistica, a las similaritats e a las diferéncias entre las divèrsas lengas romanicas ».

Lo conceptor del jòc recampèt de frasas en còrse e occitan alprèp de personas que practican la lenga cada jorn, e per las autras lengas, consultèt un  grop d'expèrts, sòcis de l'Associacion internacionala per la compreneson de l'intercompreneson (Apicad), partenària del projècte.

Es un jòc d'exploracion amb 5 mondes qu'an una tematica  pròpria (las salutacions, lo temps, lo viatge, eca.). A cada nivèl, i a doas partidas : una que consistís a reconéisser lo sens dels mots e expressions, l'autra que consistís a identificar la lenga d'aquestes.  Ne cal reconéisser coma cal lo mai grand nombre per poder passar al nivèl seguent.

Lo podètz descargar a gratis, e es disponible sus las plataformas Android e iOS. Vòl tocar totes los publics, los neofites curioses coma los locutors en cèrcas d'un desfís, los pichons coma los mai grands.

Un extrach en video :