Ives Roqueta e Marcèu Esquieu

Marcèu Esquieu, Ives Roqueta

Lo Congrès fa omenatge a dos grands òmes qu'an dedicat lor vida a la promocion de la lenga e la cultura occitanas : Ives Roqueta e Marcèu Esquiu, que nos an quitats totes dos a la debuta del mes de genièr.

Ives Roqueta, nascut en 1936 a Seta, escrivan, poèta, èra un dels animators del movement politic e cultural occitan. Fondator de la revista Viure e de l'ostal de disques Ventadorn, es tanben a l'origina del CIDO, vengut ara lo CIRDÒC. Èra fòrça implicat politicament, tant per la lenga coma per de causas mai generalas que pertocavan lo domeni occitan (viticultura, agricultura...). Èra l'autor de romans, poesias, pèças de teatre, contes, e traductor de mantunas òbras del francés a l'occitan.

Nascut en 1931 dins Òlt e Garona, Marcèu Esquieu consacrèt el tanben sa vida a far conéisser la lenga occitana. Aquel engatjament passava mai que mai per l'ensenhament. Èra professor a Vilanuèva d'Òlt, creèt en 1973 l'Escòla occitana d'estiu e participèt tanben a d'emissions de television pedagogicas sus l'occitan. Contaire e autor, escriguèt nombrosas òbras de pròsa, de poesia o de teatre en occitan. Editèt d'autors desapareguts coma Jansemin o Paul Froment, foguèt cap-redactor de Camins d'Estiu e responsable de las edicions Forra-Borra e E.O.E.

La mòrt d'aqueles dos òmes es una pèrda de las grandas per la lenga e la cultura occitanas.