Formacion intensiva a l'occitan

Formacion del CFPO

La Region Miègjorn-Pirenèus es mèstre d'òbra d'una formacion intensiva a l'occitan modèrne. Es estada fisada al CFPO Miègjorn-Pirenèus (Centre de Formacion Professionala en Occitan) e se debanarà del 6 de genièr al 30 de junh de 2014.

Los aprenents trabalhan 35 h per setmana, siá al centre de formacion, siá dins una entrepresa qu'emplega la lenga occitana. La tòca es de bastir un percors d'accès a l'emplec e/o a la formacion, de comprene las caracteristicas especificas d'un o mantun mestièr dins lo sector cultural de l'occitan, de far un punt sus las ressorsas a mobilizar e sus la motivacion dins la realizacion del projècte professional, mai de confrontar aquel projècte a las realitats del mestièr visat. Mas primièr, l'objectiu es d'aquesir la lenga occitana.

Los estagiaris descobriràn atal los mestièrs de l'ensenhament, de la cultura, de l'animacion e de la valorizacion del patrimòni.

Per accedir a aquela formacion, cal èstre demandaire d'emplec e aver un interès per la lenga e la cultura occitanas. Dètz plaças son dobèrtas per l'annada 2014. Se cal inscriure alprès del CFPO Miègjorn-Pirenèus.