Primièra Jornada Occitanica

Jornada Occitanica

Occitanica, la mediatèca numerica occitana, organiza sa primièra Jornada lo dijòus 17 d'octobre al CIRDOC de Besièrs, dins Erau. Aurà per tematica lo collectatge filmat.

Las Jornadas Occitanica an per tòca de far rencontrar de monde venguts de totes los orizonts, geografics o professionals, a l'entorn d'una tematica. Ara, la mediatèca numerica a un malhum de mai d'un quarantenat de partenaris, e pas sonque dins lo domeni de l'occitan. L'idèa es de far escambiar aquel monde que son en ligam amb la cultura nòstra, que sián d'associacions, de tecnicians, d'institucions...

La primièra Jornada se titolarà « Filmar la paraula » e recamparà monde que trabalhan dins l'audiovisual e lo collectatge. Se questionaràn sus diferentas problematicas :
- quina plaça balhar a l'imatge filmat dins la collècta de la memòria e de la lenga ;
- cossí lo valorizar e l'utilizar ;
- perqué e cossí filmar la paraula ?
Son previstes de conferéncias, de projeccions, un talhièr vidèo e de taulas redondas. I participaràn d'estructuras coma l'IEO de Lemosin, l'IEO d'Avairon, lo collectiu Dètz, lo centre Aprene e la Mòstra de cinèma occitan Llanterna digital.

Lo programa complet serà lèu disponible sul site del CIRDOC, www.locirdoc.fr.