Lo XIen Congrès internacional de l'AIEO se farà a Lhèida

Lhèida

Lo Congrès de l'Associacion Internacionala d'Estudis Occitans de 2014 se tendrà a Lhèida del 16 al 21 de junh. Se farà sul tèma « Los estudis occitans : de tempses novèls, de novèlas perspectivas ». Permet dempuèi mai de 20 ans de portar lo lum sul trabalh de la comunitat scientifica occitana. Ajuda tanben los escambis entre cercaires que s'interèssan a l'occitan a un nivèl internacional.

L'AIEO, sòcia del Congrès permanent de la lenga occitana, se recampa cada tres ans per un congrès a l'entorn de la lenga e la cultura. L'associacion se balhèt per objectiu la promocion dels estudis occitans dins l'ensemble de las disciplinas de las sciéncias socialas e umanas. Per çò far, contunhèt d'organizar los congrèsses regulars, i ajustèt de collòquis e de jornadas d'estudis e adoptèt lo principi d'una colleccion de publicacions scientificas.

Los congrèsses internacionals de l'AIEO se fan cada tres ans. Recampan de scientifics de mantuns parçans del monde qu'intervenon dins mantunas disciplinas : lenga e literatura medievalas, modèrnas, linguistica, sociolinguistica, istòria... Pendent quicòm coma cinc jorns lo mond pòdon escambiar, assistir a d'obradors, partejar lors recèrcas, participar a de conferéncias plenièras... A aquela escasença se fa tanben l'Amassada generala de l'associacion.

En 2014, lo congrès se farà doncas en Catalonha. « Serà lo primièr còp qu'aquel rescontre scientific se debanarà dins un endrech ont l'occitan es lenga oficiala », çò remarca l'AIEO dins sa primièra circulara pertocant aquel eveniment. « I festejarem lo quart de sègle de l'oficializacion de la lenga occitana dins la Val d'Aran », çò ajusta. Explica que Lhèida es la capitala administrativa del sol territòri occitan de l'Estat espanhòl, e tanben la sola vila de l'Estat ont son prepausats estudis occitans.

Es lo Campus de Cappont de l'Universitat de Lhèida qu'aculhirà lo congrès. Totas las manifestacions s'i debanaràn, levat per la jornada del dimècres 18 pendent la quala es prevista una excursion dins la Val d'Aran. Los autres jorns, conferéncias e obradors seràn organizats a l'entorn de sèt axes : occitan modèrne, occitan ancian, literatura occitana medievala, literatura occitana modèrna e contemporanèa, las politicas linguisticas de l'occitan, la Catalonha occitana e l'Occitània catalana, cultura occitana.

Lo mond que vòlon presentar una comunicacion a l'escasença d'aquel congrès devon mandar lors proposicions abans lo 31 de novembre de 2013. Se volètz assistir al congrès, vos podètz marcar fins al 31 de genièr de 2014 amb la tarifa normala. Serà mai car après.

Trobaretz totas las informacions que pertòcan aquel congrès sul site de l'AIEO, Associacion Internacionala d'Estudis Occitans.