Encontre occitan a Turin : estat deus lòcs de las lengas e perspectivas

Encontre occitan a Turin

Entà bastir los utís numerics occitans a viéner, lo Congrès qu’ei a l’òra d’amassar còrpus, notadament per las varietats mensh dotadas.

Atau lo Congrès qu’encontrè actors de l’occitan cisaupenc (l’occitan de las valadas aupencas en Itàlia), en partenariat dab la Chambra d’Òc, los 19 e 20 de julhet passats. Purmèr a Draonier, puish l’endedia a Turin, au Palazzio Cisterna, lòc istoric e simbolic màger on ei installada la Città metropolitana di Torino.

Qu’estó lo parat de descobrir la mustra apitada per la Chambra d’Òc a l’entorn deu documentari Bogre, au musèu Mallé de Draonier puish de conéisher las activitats atau com l’espaci museografic de l’Espaci occitan – duas institucions de compte har tà çò de la difusion e dela promocion de l’occitan cisaupenc (qui ei lenga oficiau de la region Piemonte en Itàlia).

Fin finala lo dimars que’s hasó un talhèr de presentacion e d’escambi de las produccions nostas e de las entitats locaus qui òbran per las lengas en plaça : l’occitan cisaupenc, vivaroaupenc mes tanben lo franco-provençau. Que i èran representants de la Chambra d'Òc e de l’Espaci Occitan – Museo Occitano solide, mes tanben de l'Università degli Studi di Torino, de l'Espaci Occitan dels Aups o enqüèra l'Institut de la langue savoyarde. Qu’ei adara en saber los camps d’accion de cadun deus actors qui poderam de la rentrada enlà planificar miélher, mutualizar e projectà’ns cap au desvolopament numeric de las lengas e varietats mentavudas.