Lo Congrès a la WikidataCon 2019

WikidataCon2019

Los 25 e 26 d'octobre passats, Aura Séguier (desvolopaira al Congrès) e Vincent Gleizes (ancian estagiari al Congrès) èran a Berlin, a la WikidataCon2019, per i presentar lor projècte de vèrsament de lexèmas occitans a Wikidata.

La WikidataCon es un eveniment qu'amassa contributors e professionals que trabalhan a l'entorn de Wikidata, la basa de coneissenças contributiva de Wikimedia. Pendent dos jorns, los participants i presentèron de projèctes qu'utilizan Wikidata o qu'an per tòca de l'enriquesir, i sosquèron a l'avenidor d'aquel otís…

Dins aquel encastre, Lo Congrès i presentèt AitalvivèmBot, un programa realizat per Vincent Gleizes dins l'encastre de son estagi en julhet passat. A per tòca de versar automaticament las donadas lexicograficas del Congrès dins Wikidata.

Aquel vèrsament es necessari per la construccion d'unes dels futurs otisses del Congrès. D'efièit, cal saber que Wikidata permet de ligar de mots al concèpte (comprensible pels ordenadors) que representan, e doncas de balhar a una maquina una representacion del sens d'un tèxte. Aquel procediment es a la basa de tot otís que fa d'analisi semantica : resumit de tèxte, classificacion de documents, sistèma de question-responsa, chatBot, assistent intelligent per smartphone…

Wikimedia France a entrevistat Vincent Gleizes e Aura Séguier, responsabla deu pòle TAL deu Congrès, per far conéisser aquel trabalh a la comunautat : Legir l'entrevista.