Convencion-quadre Lo Congrès ∕ Novelum

Convencion-quadre dab Novelum

    Un pas en avant per la varietat lemosina de l'occitan : una convencion-quadre ven d'èsser signada entre Novelum (IEO 24) e lo Congrès permanent de la lenga occitana.

    D'efiech, lo problema de las ressorsas numericas en occitan lemosin – e en nòrd-occitan de biais generau – es pas nuòu e se quò es verai que lo Congrès aviá desjà integrat un lexic lemosin au dico d'Òc, quò era evident que quò era pas pro per enfortesir la lenga en linha.

    Per 'nar mai luenh, quela convencion permetrá de lançar un programa de mai d'una annada per constituir un brave còrpus necessari a la transmission, difusion e usatge de l'occitan lemosin.

    3 aisses essenciaus fugueren retenguts :
- creacion d'una version en occitan lemosin dau vèrb'Òc, conjugador occitan ;
- constitucion d'un còrpus textuau numerizat en occitan lemosin ;
- valorizacion de las ressorsas toponimicas en occitan lemosin.

    D'un costat, Novelum fornirá las ressorsas lexicograficas e textualas mas tanben las basas toponimicas de las edicions Novelum.

    De l'autre costat, lo Congrès podrá constituir en partenariat lo vèrb'Òc dins sa version lemosina, mas tanben espleitar lo còrpus textuau reculhit per enrichesir lo vèrb'Òc d'una man, mas subretot preparar las aplicacions directas de queu contengut : corrector ortografic, clavier predictiu, traductor automatic, detector de varietats...

    Un chantier indispensable per la difusion de la lenga occitana dins lo respecte de sa diversitat.