Lo Congrès envitat per Euskaltzaindia

XXIIIaus « Encontres Jagon »

Lo Congrès qu'èra envitat a Pampalona lo 17 de genèr aus encontres « Jagon » tà parlar de las soas activitats.

Dens l'encastre deu son centenari, Euskaltzaindia, Acadèmia de la lenga basca, qu'organiza ua seria de congrès tematics. Aquestes que tractan de mantuns aspèctes lingüistics, juridics e sociaus e que i participan expèrts de l'euskara e de las lengas minorizadas.

Lo Congrès qu'èra envitat a Pampalona taus XXIIIaus « Encontres Jagon », qui avèn lo tèma « velhar a las lengas minorizadas, víver en euskara ». Benaset Dazéas, director deu Congrès, que i hasó ua intervencion tà çò de las activitats de l'organisme de regulacion lingüistica de l'occitan.

Lo Congrès que tornarà en Euskadi, à Gasteiz, au parat d'un collòqui internacionau d'onomastica, los 13 e 14 de junh. Vincenç Rivière, encargat de mission lingüistic au Congrès, que i harà ua comunicacion tà çò de la normalizacion deus toponimes gascons.

Las collaboracions entre lo Congrès e Euskatzaindia que permetèn dejà la constitucion de Linguatec (programa transfronterèr de desvolopament de las tecnologias deu lengatge). Aqueras que seràn ahortidas tà las annadas a viéner : que serà creat a l'abòr de 2019 un hialat europèu d'Acadèmias e centres d'estudis de lengas minorizadas. Que portarà cooperacions en tèrmis de recèrca scientifica, de publicacions, de transferiment de metodologia e d'organizacion d'eveniments (congrès, seminaris, jornadas). Qu'a l'objectiu de balhar mei de visibilitat a las comunautats lingüisticas minorizadas e de valorizar la diversitat lingüistica au nivèu europèu.