Desvolopar las soas aplicacions dab las dadas deu Congrès

API deu Congrès

Tà melhorar la difusion de las soas dadas e perméter la creacion de servicis navèths, Lo Congrès qu'a bastit API (Application Programming Interface) de las soas ressorsas màgers. D'ara enlà los desvolopaires en lenga occitana que pòden, tà las lors aplicacions o los lors sites Internet, utilizar a distància dadas qualificadas, mantiengudas e actualizadas.

Qu'an l'accès a l'express'Òc, lo top'Òc, lo Basic, vèrb'Òc, punt de lenga o los diccionaris de las rimas e deus sinonimes deu Congrès. Que's pòt, per exemple, bastir un module tà un site web qui afiche ua expression a l'azard, ua foncionalitat qui ajuste lo nom en occitan de las comunas dens lo son agenda, un programa qui balhe a un escolan la conjugason d'un vèrbe diferent cada matin, un utís d'ajuda a la redaccion qui prepause sinonimes d'un mot dejà utilizat dens la frasa... n'a pas sonque las limitas de l'imaginacion !

Tà illustrar las possibilitats de las API, Lo Congrès qu'a tanben desvolopat modules a l'entorn de la lenga occitana qui podetz integrar dirèctament aus vòstes sites o blògs. N'i a pas nat besonh de nada coneishença tecnica tà integrar a las vòstas paginas l'afichatge a l'escadut d'ua expression de l'express'Òc, d'un toponime deu top'Òc, d'ua conjugason deu verb'Òc o d'un article deu punt de lenga.

E mei qu'ei a gratis, lavetz hètz-vs'i !