XIen congrès de l'AIEO

Congrès de l'AIEO

Lo XIen congrès de l'Associacion internacionala d'estudis occitans se debanarà del 16 al 21 de junh a Lhèida, en Catalonha. Quicòm coma 150 personas vengudas d'un seissantenat d'universitats d'un dotzenat d'Estats i intervendràn sus divèrsas tematicas ligadas a la lenga e la cultura occitanas.

L'obertura oficiala del congrès se debanarà lo diluns 16 a 9 h. Serà seguida de la conferéncia inaugurala de Georg Kremnitz. Pendent las jornadas, poiretz assistir a d'obradors, de conferéncias e de taulas redondas. Lo ser son previstas d'unas animacions coma un concèrt d'Alidé Sans, de teatre amb Era Cabana e un balèti de Kaj Tiel Plu. Lo congrès se clavarà lo dissabte 21 amb l'Amassada generala de l'AIEO a 11 h 05.

D'unes omenatges seràn faits pendent lo congrès, a de personalitats coma Robèrt Lafont, Martí de Riquer e Peter Ricketts. Los participants poiràn visitar l'exposicion « Seta, vila occitana » de l'artista catalan Xavier Moliner i Milhau o assistir a Llanterna Digital, la mòstra de cinèma occitan. La Generalitat de Catalonha a tanben causit l'encastre del congrès per la remesa del prèmi Robert Lafont, que se farà lo diluns a 19 h 30.

« La lista dels subjèctes e dels autors de las comunicacions daissa veire que lo congrès de Lhèida aurà una granda qualitat scientifica », çò anóncia la tresena circulara del congrès. Pertocaràn la lenga, la lingüistica, la literatura, la toponimia, la sociolingüistica, la musica, l'istòria, la terminologia, la pedagogia... D'unes sòcis del Conselh lingüistic del Congrès Permanent de la Lenga Occitana faràn partida dels intervenents.

Los resumits de las comunicacions son ja disponibles sul site del congrès de l'AIEO. I trobaretz tanben lo programa de l'eveniment e d'unes documents complementaris.

A costat d'aquò, los actes del darrièr congrès (que se debanèt a Besièrs del 12 al 19 de junh de 2011), son estats editats per C. Alén Garabato, C. Torreilles et M.-J. Verny. Los trobaretz sul site de LLACS jol títol Los que fan viure e treslusir l’occitan.