L'InÒc qu'organizè un collòqui suu PCI

Lo Patrimòni Culturau Immateriau : de l'inventari a la governança

L'InÒc Aquitània e lo laboratòri ITEM de l'Universitat de Pau e deus país de l'Ador que coorganizèn a Pau, deu 15 au 17 de mai, un collòqui internacionau titolat « Lo Patrimòni Culturau Immateriau : de l'inventari a la governança ».

La significacion de « patrimòni culturau » qu'a hèra cambiat au briu d'aquestas darrèras decennias, en partida per'mor deus instruments elaborats per l'UNESCO. Lo patrimòni culturau ne s'arrèsta pas aus monuments e a las colleccions d'objèctes. Que compren tanben las tradicions o las expressions vivas eretadas e transmetudas com las tradicions oraus, las arts tradicionaus de l'espectacle, las practicas sociaus, los rituaus e eveniments hestius, las coneishenças e las practicas qui pertòcan la natura e l'univèrs o las coneishenças e lo saber-har necessaris a l'artisanat tradicionau.

La Convencion tà la sauvaguarda deu patrimòni culturau immateriau, hèita en 2003 per l'UNESCO e signada per França en 2006, que torna interrogar au còp lo patrimòni etnologic dab ua implicacion notabla deus grops e de las comunautats, e los diferents dispositius reglamentaris o de sostien au patrimòni culturau e naturau.

Despuish 2006, la nocion de patrimòni culturau immateriau (PCI) qu'a drin a drin trobat un reclam dens lo hialat associatiu francés, dens los dispositius publics e organigramas de las collectivitats territoriaus e deus servicis desconcentrats deu ministèri de la Cultura dens las regions (DRAC). Qu'ei en aquera dinamica qui ei estat aviat, en 2008, un inventari deu PCI en Aquitània per l'Etnopòle InÒc Aquitània e lo laboratòri ITEM de l'UPPA, qui ei ua de las purmèras experiéncias en França.

Obèrt au gran public, aqueth collòqui qu'estó lo parat de tornar sus aqueras sèt annadas d'experimentacion de la nocion d'inventari e de las méter en perspectiva dab autas enterpresas miadas en França e capvath lo monde.