Letra de ligason :

Cors novèl de judeoprovençal en linha

Judeoprovençal

Un cors en visioconferéncia de judeoprovençal serà balhat a l'Universitat d'Oxford al segond semèstre 2022-2023.

Serà lo primièr còp qu'aquela varietat s’ensenharà dins una universitat, pel mai grand especialista de la question : lo Doctor Peter Nahon, de l'Universitat de Neuchâtel.

S'agirà d'una introduccion al judeoprovençal e als dialèctes aparentats istoricament escriches e parlats pels josieus del sud de França. Los documents d'origina josieva en gallo-roman meridional (occitan/provençal) se despartisson en doas categorias :

  • los tèxtes escriches amb l'alfabet ebrèu, que van del sègle 12en al sègle 18en e comprenon de glòsas aital coma de tèxtes complèts de natura literària o liturgica ;
  • los tèxtes en letras latinas, que van del sègle 16en al sègle 20en, que representan tipicament de varietats vernacularas caracterizadas per una variacion granda e un fum de mots manlevats a l'ebrèu.

Lo cors cobrirà los dos còrpus : amb l'ajuda d'espleches de recèrca utilizats en dialectologia romanica, los participants seràn guidats per desvolopar de competéncias de lectura, de traduccion e d'analisi lexicala, morfologica e sintaxica dels tèxtes. Las especificitats del judeoprovençal respècte als dialèctes generals del sud de França seràn egalament estudiadas dins un encastre sociolingüistic e istoric. Qualques sessions seràn consacradas a las varietats occitanas aparentadas parladas pels josieus dins d'autras regions del sud de França (Gasconha e Niça).

Dobèrt als falses debutants, una mestresa de l'alfabet ebrèu es pasmens requerida ; de coneissenças elementàrias en francés o dins una autra lenga romanica serián benvenguts.