Letra de ligason :

Pòrtas alandadas de la Ciutat de Pau

Pòrtas alandadas Ciutat

Lo 18 de junh de 15h a 18h la Ciutat que vs’alanda las pòrtas entà descobrir çò qui s'escón dens cada bastiment atau com l'activitat de las estructuras aderentas.

Que serà lo parat tau gran public de passar las pòrtas deu Congrès permanent de la lenga occitana, au 2au solèr deu bastiment Creem !, e de descobrir atau las installacions navèras dens las quaus ns’i hèm tot dia entà har la lenga mei accessibla entà tots.

Tota l’equipa que s’estarà a la vòsta disposicion tà tota question, que s’agisca de socializacion de la lenga, de questions de normalizacion lingüistica numerica, deu metòde de tribalh, deus logiciaus emplegats, de l’anar deus partenariats qui avem… O mei simplament de (tornar) descobrir utís entaus telefonets, tauletas e ordenators qui ne coneishetz pas enqüèra o qui n’avetz pas podut installar e/o har foncionar !

Entaus mei curiós, que’vs poderam autanplan muishar los projèctes mei recents suus quaus e tribalham, com Votz, purmèra sintèsi vocau en occitan, ReVOc, la reconeishença vocau en occitan, e sustot la tant esperada Revirada, traduccion automatica occitan/francés e francés/occitan.

N’esitetz pas a viéner equipats deu vòste esmartfòne, tauleta e/o ordenator, si cau, l’experiéncia que’n serà d’autant mei ludica com practica !

Au delà de l’estructura deu Congrès, lo long de la vrespada que’s tieneràn encontres tà çò de Perqué ei indispensable de's contar istòrias ?, apréner l'occitan bearnés en s’amusant dab lo pòle de las Calandretas, lectura kamishibaï, la mediatèca deu CIRDÒC-Institut occitan de cultura, l'exposicion « Trucs » a l'entorn de las esquiras, o enqüèra encontres dab un artista a « CÈRC » l'espaci de creacion de Hart Brut…

Ça-vietz nombrós !