Lexic occitan de l'Istòria-geografia

Lexic occitan de l'Istòria-geografia

Lo Congrès Permanent de la Lenga Occitana a per objectiu de respondre als besonhs dels usancièrs de l’occitan a començar per los dels aprenents e dels ensenhaires. Aprene l’istòria e la geografia segon los programas definits per l’educacion nacionala implica l’utilizacion e l’aquisicion d’un vocabulari especific. Tre que se començèt d’ensenhar l’istòria geografia en occitan la question del  vocabulari occitan se pausèt. Patrici Pojada e Sergi Carles, a l’iniciativa del rectorat de Tolosa, donèron ja una prumièra responsa plan utila als professors e escolans engatjats dins l’aventura del bilingüisme.

Lo Congrès trabalha ara a  un alargament  del  vocabulari occitan de l’istòria geografia pels collègis e licèus, en partiguent d’una tièira de referéncia establida per l’ensenhament en francés. Aplica un de sos principis qu’es la valorizacion de l’unitat, de çò comun, tot en respectant la diversitat de la lenga. Pel moment ça que là, se limita a l’ensemble lengadocian-gascon ont son situats la granda majoritat dels escolans qu’aprenon l’istòria e la geografia en occitan.

Un document de trabalh es estat establit. Integra la basa iniciala de Patrici Pojada e la tièra de referéncia en francés (unes 3 000 mots en tot). Abans d’acabar aquel document e de lo far validar per una comission del Conselh linguistic del Congrès, l'idèa es de lo far conéisser a de professors que ja ensenhan l’istòria e la geografia en occitan e a de professors d’istòria e geografia que an de competéncias en occitan. Lo Congrès vòl, compte tengut de lor experiéncia, recaptar lor vejaire, lors remarcas e proposicions en general mas tanben los escotar a prepaus de las causidas que lor semblarà bon de discutir.

Aquel vocabulari deuriá èsser disponible en linha sul site del Congrès per la dintrada escolara 2013.