Lo CIRDOC

Lo CIRDÒC - Centre Interregionau de Desvolopament de l’Occitan, Mediatèca occitana, qu’ei l’establiment public de vocacion interregionau encargat d’aparar, de promòver e de har conéisher lo patrimòni e la creacion occitana. Lo CIRDÒC qu’ei una estructura originau, qui’s vòu adaptada tant a l’istòria com a la geografia occitana, qui representa 1 000 ans de cultura viva. Qu’ei lo sol establiment public (sindic mixte) de la cultura occitana, dab 14 emplegats (dont un conservator, plusors encargats de conservacion, e un pòle informatic). Qu’a un gran bastiment dens lo centre de Besièrs.

A l’òra d’ara, la colleccion qu’ei de mei de 80 000 títols publicats deu sègle XVIau a uei lo dia (manuscrits, libes, archius, revistas, particions, enregistraments sonòrs e audiovisuaus, afichas, fotografias, etc). Mercés a ua politica d’aquisicion sostienguda e sistematica, mercés a dons e lèishs generós, las colleccions deu CIRDÒC que son hèra completas.

Per’mor deu desvolopament d’aquestas e de l’expertisa aquesida dens lo maine deu patrimòni e de la creacion en occitan, que signè en 2006 dab la Bibliotèca Nacionau de França ua convencion de pòle associat qui’u reconeish l’autoritat tà çò de la lenga e la civilizacion occitana.

Entermiei las missions novèlas qui lo CIRDÒC deurà complir com establiment d’excelléncia documentària, que figuran la produccion de la bibliografia occitana e lo desvolopament de la cooperacion autorn deu patrimòni occitan.

Lo CIRDÒC que mia accions interregionaus entau patrimòni e la creacion occitana : partenariats de numerizacion d’òbras, coproduccions d’eveniments, sostien aus portaires de projèctes au nivèu interregionau, creacion d’utís de coneishença e d’espandiment de l’occitan (Bibliografia occitana, portau Internet « La Pòrta d’Òc » – www.laportadoc.eu –, observatòri de l’edicion), concepcion e prèst de mustras o de documentacion. 
Enfin, lo CIRDÒC que pòrta la mestria d'òbra de la grana mediatèca virtuau cooperativa - www.occitanica.eu - vertadèra platafòrma de difusion multimèdia deu patrimòni e de la creacion occitana. Qu’ei un projècte istoric au quau participan institucions culturaus e collectivitats territoriaus de l'espaci occitan.

Site internet : www.locirdoc.fr