Letra de ligason :

L’OPLO qu'entercalha au President de la Republica

Ofici public de la lenga occitana

Una mocion portada pr’aus elegits regionaus a l’atencion deu President de la Republica per l’alertar sus la situacion de l’occitan.

Las Regions Novèla-Aquitània e Occitania, representadas per Charline Claveau-Abbadie e Patric Roux, respectivament President e 1èir Vice-President de l’Ofici public de la lenga occitana, desirèren sasir lo President de la Republica, lo Purmèir Ministre e lo Legislator au subjècte de las dificultats rescontradas uèi per la lenga occitana.

Se disen particularament tafurats per las consequéncias de la reforma deu licèu sus l’ensenhament de l’occitan, dorsèir qu’evolua pas pr’au moment a maugrat de la mobilizacion de l’OPLO e de las Regions per alertar lo Ministre de l’Educacion nacionala dempui mantuns mes ja.

Es enfin question deu flaquèir deus mejans autrejats per l’Estat a las associacions e a l’OPLO. A n’aqueth perpaus, la participacion de l’Estat a l’OPLO representa pas que 3% deu son budgèt, quan la mejana se situís entre 20 e 30% pr’aus utís equivalents en França.

Aquera mocion estut adoptada per l’amassada generala de l’OPLO, 5 votz per las Regions Novèla-Aquitània e Occitania e una abstencion de l’Estat (mocion sancèira en annèxa).