Lo Conselh linguistic s'acampèt lo 1èr de junh a Montpelhièr

Amassada deu Conselh lingüistic deu Congrès

Lo Conselh linguistic, conselh assessor del Congrès permanent de la lenga occitana, s'es recampat lo dissabte 1èr de junh a l'Universitat Paul Valèry de Montpelhièr jos la presidéncia de Patric Sauzet.

Lo Conselh linguistic trabalha ara sus quatre axes : la gestion de la grafia classica e la validacion de las normas publicablas, la constitucion d'una basa de donadas terminologicas occitana, l'inventari de las publicacions linguisticas de referéncia e la creacion d'un diccionari basic en linha francés-occitan. De conselhièrs linguistics son ja engatjats dins diferentas còlas de produccion que son al trabalh.

Aquela amassada foguèt l'escasença per Gilabèrt Mercadièr, President del Congrès, de far un resson de l'Amassada generala del Congrès, un rendut compte del primièr acamp del Conselh dels usatgièrs que se debanèt a Tolosa lo 29 de mai e de presentar de questions graficas e ortograficas que se pausan las còlas de trabalh. Atal, lo Conselh linguistic poguèt començar de soscar als biaisses de s'organizar per respondre a las demandas de la comunitat occitana. De documents de trabalh seràn meses en consultacion.