Letra de ligason :

Sélectionnez votre langue

Amassada per la lenga e la cultura occitanas en Auvernhe-Ròse-Aups

Lo 9 de julhet a l’Ostal de Region de Clarmont d’Auvernhe se faguèt “l’Amassada per la lenga e la cultura occitanas en Auvernhe-Ròse-Aups” ont s’acampèron mai de 50 personas representantas de las associacions e institucions occitanas e de la region.

La jornada se dubriguèt amb una video d’acuèlh de Laurent Wauquiez, President de la Region, que declarèt qu’Auvernhe-Ròse-Aups èra “una granda region d’Occitània” e que la lenga i èra enrasigada en tot estant “extraordinàriament modèrna”. Anoncièt tanben un programa d’accions a venir, amb de convencions, per desvolopar la lenga dins la region.

Seguiguèron las intervencions de François Duval (director de la Cultura de la Region) e de Gilabèrt Mercadièr (president del Congrès).

Se passèt puèi d'extraches de dos films per far plan veire l'importància e la valor de la transmission per l'ensenhament bilingüe.

Bernat Giacomo (CFPO Auvernhe) presentèt un panorama complet dels actors e de las realizacions mestras en region, seguit per las intervencions de Desdièr Huguet (ensenhament public), Marie Barret (federacion regionala Calandreta), Thierry Bousseau (agéncia Sirventés), Jean Roux (IEO), Jean-Baptiste Martin (edicions EMCC), Mickaël Neyrolles (IEO Ròse-aups), Crestian Bonnet (Universitat de Clarmont).

Lo vèspre se trabalhèt en taulas redondas - ensenhament e transmission, accion culturala e creacion artistica, edicion e difusion, socializacion e mèdias. Los raportaires presentèron per cada talhièr de proposicions d’objectius e d’indicators d’evaluacion. Se publicarà aquestas setmanas un document de sintèsi d'aquela amassada.

Enfin Martine Guibert, vicepresidenta de la Region, clavèt la jornada. Los participants e los representants de la Region s’acordèron sus la qualitat dels escambis e prepausèron que l’Amassada siá annadièra. Aquel 9 de julhet, que permetèt als actors de la cultura occitana d'escambiar entre eles e amb la Region, es doncas una data importanta per la cultura e la lenga dins lo Nòrd e l’Èst d’Occitània !