Letra de ligason :

L'advèrbi

Origina e formacion dels advèrbis

Arribar

« Arribarà lèu, me pensi »

Un advèrbi es un element que se restaca a un autre element de la frasa e lo modifica. Coma es un element facultatiu de la frasa, ges d’element depend d’el.

Los advèrbis an mai d’una origina. N’i a que son eiretats del latin : « mens » | « mensh », « plan », « puèi » | « puish », « mai » | « mei », « pro »... « Soi pas plan content de çò qu’a fach ».

N’i a que son d’ajectius : « bas » | « baish », « fort » | « hòrt », « lèu », « sarrat »... « M’agradan fòrt », « Arribarà lèu, me pensi ».

N’i a que son fargats per composicion amb d’autres elements gramaticals : « adara », « alavetz », « capsús », « capvath », « longtemps », « sonque », « tanpauc» | « tanpòc », « totjorn » | « tostemps »... « Sèm totjorn d’acòrd », « A longtemps que l’ai pas vist ».

Una bona part dels advèrbis son de formacions derivadas amb lo sufixe -ment que s’apond a la forma del femenin singular : « long », « longa » > « longament », « primièr, ièra » > « primièrament », « vertadièr, ièra » > « vertadièrament »,... De notar que l’accent escrich sul femenin de l’adjectiu se consèrva dins l’advèrbi format amb -ment.

Andriu Bianchi, sòci del Conselh lingüistic del Congrès

Bibliografia :

  • Gramatica occitana d'Alibèrt
  • Gramatica de l'occitan gascon contemporanèu de Romieu & Bianchi
  • Diccionari ortografic, gramatical e morfologic de l'Occitan de Josiana Ubaud

Fòto : Delmottte

En aliança amb La Setmana