Letra de ligason :

Lexics occitans especializats

Lexic occitan especializatLos lexics occitans especializats publicats dinc adara qu'avón divèrsas escadudas e que's presentan uei lo dia dab mei d'ua forma : quantitativas, dab o shens definicions, publicadas en divèrs format (papèr, numeric), accessibles en linha o non...

Los lexics occitans que gessin de tres honts màgers (InÒc Aquitània, Institut d'Estudis Occitans e Termcat), totun ne cau pas desbrembar lo molon de lexicòts hèits per particulars. Tots aqueths lexics que son realizats segon las afranquidas, los centres d'interès, las competéncias o enqüèra las missions deus autors e, malaja, que son esbarrisclats e lo gran public ne'us coneishen pas hèra.

Per'mor de l'eterogeneïtat e de la dispersion de l'informacion, que hasè hrèita de valorizar çò qui existiva en hant compte de las caracteristicas tecnicas e politicas que la terminologia occitana encontrarà doman. Tad aquò har, Lo Congrès qu'a aviat ua aliança dab l'InÒc Aquitània entà bastir lo term'Òc, basa terminologica occitana.

En aquera part deu site, Lo Congrès que s'ei tienut a har accessibles los lexics de faiçon individuau mercés a noticias publicadas : aquestas que son normadas e que permeten d'aver ua presentacion unenca per cada hont (autor, annada, operator, varianta tractada, lenga, descripcion), mes tanben d'ui accedir que que'n sia lo format (tablador, pdf o site extèrne).

Los qui vòlen har ua cèrca transversau o mei avançada que s'ac pòden: la màger part deus lexics que son accessibles mercés au motor de recèrca deu term'Òc.