Letra de ligason :

Segonda circulara de l'AIEO

Albi

L'Associacion Internacionala d'Estudis Occitans ven de publicar la segonda circulara pertocant son XIIen congrès que se tendrà a Albi del 10 al 15 de julhet.

I anóncia que las inscripcions en linha seràn obèrtas del 20 de febrièr al 20 de març e que lo congrès se debanarà al centre universitari Champollion.

Una primièra version del programa es tanben disponibla. Patric Sauzet, president del Conselh lingüistic del Congrès, prepausarà lo dijòus 13 una conferéncia plenièra titolada « L'unitat de la lingüistica occitana (o qual es dissident ?) ». Lo divendres 14, Myriam Bras del laboratòri CLLE-ERSS animarà una taula redonda suls còrpus informatizats per los estudis occitans.

Per çò qu'es de las comunicacions, lo divendres de vèspre la webmèstra del Congrès, Aura Séguier, ne prepausarà una titolada « Los diccionaris occitans al format TEI : realizacions e perspectivas ». Presentarà puèi lo Loflòc amb de sòcis del laboratòri CLLE-ERSS. Puèi Florença Marcouyre, lexicografa al Congrès, parlarà de la creacion del vèrb'Òc en occitan gascon. Enfin Patric Sauzet intervendrà amb Yaël Champclaux. Lo programa complet de las comunicacions serà lèu disponible.