Adara que son acabadas senglas Universitats Occitanas d’Estiu a Nimes e a La Guépia, debanadas au mes de julhet

(e qui n’avem pas mancat de relajar suus hialats sociaus) qu’ètz enqüèra a temps de participar a l’Escòla Occitana d’Estiu a Vilanòva d’Òut (pròche d’Agen), deu 11 au 17 d’aost.

Que serà la 45^au, tostemps organizada per l’IEO 47, e qu’i arretroberatz cors de lenga (en 3 varietats : gascon, lemosin, lengadocian), talhèrs de dança, de canta, de Wikimedi’Òc, de relaxacion, d’etnografia, de toponimia, de lenga e cultura catalanas, d’informatica en occitan, e tanben conferéncias (actualitat, literatura, istòria), passejadas ludicas e culturaus, espectacles (contes, teatre, restitucion d’estagis), concèrts e bals, plan solide.

Que cau saber tanben un centre de lésers qu’arcuelherà los mei joens en acòrd dab lo lor atge : « l’escoleta d’estiu » taus mainats de 5 a 9 ans, e « l’escòl’ados » taus mei grans de 10 a 16 ans. Qu’auràn de prevista ua pièla d’activitats ludicas hòrt variadas, que sian manuaus, artisticas, linguisticas, esportivas, o enqüèra jòcs e sortidas, etc.

Tà çò de las tarifas deus talhèrs autant com de l’aubèrgament, e tà tota entersenha mei : http://www.eoe-oc.org