Letra de ligason :

Sélectionnez votre langue

Projèctes 2019 deu Congrès

Traductor automatic, corrector ortografic, sintèsi vocau... Las òbras deu Congrès tà l'annada qu'arriban a fanègas.

Purmèr, a la seguida deu son clavèr predictiu sortit a la fin de 2018, Lo Congrès que harà paréisher un corrector ortografic taus logiciaus de messatgeria, de tractament de tèxte e taus navigators web. Que l'auretz dens las setmanas a viéner.

Lo Congrès que contunha lo son tribalh en l'encastre deu projècte Linguatec. Aqueth programa de cooperacion transfronterèra Espanha-França-Andòrra qu'a per tòca de desvolopar ressorsas e utís numerics tà las lengas pirenencas. Tà l'occitan, que son prevists enter autes un traductor automatic francés-occitan e occitan-francés e la sintèsi vocau. Los utís ne seràn pas acabats a la fin de l'annada, mes lo lor desvolopament que deveré estar plan avançat ad aqueth moment.

Lo Congrès qu'a tanben aviat un gran tribalh de fusion deus utís deu son site. Qu'ei a imaginar ua multi-aplicacion qui poderà, dab un sol punt d'entrada, cercar tà un mot las soas traduccions, expressions, citacions, conjugasons, rimas... Dab aquera plataforma de punta qu'anaratz d'un mot a l'aute entà'vs passejar capvath la riquessa de la lenga occitana. Lo quasèrn de las cargas d'aquera aplicacion qu'ei redigit. 2019 que's harà l'aviada deu desvolopament e de la creacion de las ressorsas entà la bastir.

Ua auta plataforma qu'ei en òbras, qui deveré era estar acabada abans la fin de l'annada. Que'vs deisham la suspresa deu contienut, mes que'vs podem dejà díser que serà en relacion dab lo maine deu tractament automatic deu lengatge tà l'occitan.

Enfin, Lo Congrès qu'a previst de publicar au dicod'Òc ua navèra version deu Basic qui amasse totas las varietats de l'occitan. Com la version actuau, que hicarà l'accent sus çò comun en tot respectant la diversitat. Atau las varietats auvernhata, lemosina, provençau e vivaroaupenca de l'occitan qu'auràn eras tanben lo lor lexic referenciau e ortografic.

Auta bona navèra taus provençaus, qui auràn pro lèu lo lor vèrb'Òc, lo conjugador automatic en occitan. Que's poderà trobar la conjugason de mantun milierat de vèrbes a partir deu lor infinitiu.

E tostemps, Lo Congrès que contunharà lo formatatge en TEI de las soas donadas, l'enriquiment deus utís deu son site (com lo top'Òc en debuta d'annada), l'aviada de navèths partenariats e la continuacion deus dejà signats... Que'n poderatz saber mei en seguint las nostas informacions suu site www.locongres.org o suus nostes hialats sociaus, e en legent la nosta letra de ligason.