La zòna dita del « creissent », als limits nòrd de la lenga occitana, es dempuèi qualques meses lo subjècte d’una enquèsta aviada per de cercaires del CNRS e sostenguda per l’Agéncia Nacionala de la Recèrca (ANR).
S’agís de completar la coneissença lingüistica actuala pertocant aquel territòri que fa quicòm coma un centenat de quilomètres de longor. Es una zòna de contacte entre l’Òc e l’Oïl qu’interèssa los linguistas.
Considèran primièr que i a urgéncia a enquestar en rason de la disparicion rapida dels locutors. A mai, es una zòna qu’a pas encara agut dret a d’estudis apregondits. Aquel territòri en forma de mièja luna es un territòri de varietats gallo-romanas qu’an pas tanpauc donat fòrça documents escriuts que viendrián ajudar la recèrca.
Los cercaires dirigits per Nicolas Quint se son ja amassats per definir e lançar lo projècte aqueste mes de febrièr. Es previst d’acabar en 2020. I aurà tanben lèu un primièr collòqui sul territòri d’aquelas varietats. Las enquèstas de terrenh seguiràn tot lo long d’aquesta annada 2018.
2019 serà l’annada de la publicacion de las primièras monografias e la mesa en linha dels corpus orals. Seràn puèi establidas de mapas dialectologicas e seràn mesas en plaça de comunicacions sus las varietats estudiadas. Enfin, sortirà en 2020 un obratge que farà la sintèsi de tot aquel programa.
Mai d'informacions :